ഓണ നിലാവ് മാത്രം ബാക്കി.

 യാതൊരു മാറ്റവുമില്ലാതെ  ഓണ നിലാവ്  മാനത്ത് പ്രഭ ചൊരിഞ്ഞ്  നിൽക്കുന്നു. കൂട്ടിന് നക്ഷത്രങ്ങളും.  അന്തരീക്ഷമാകെ വെള്ളി നൂൽ പാകിയ  വെൺപട്ട് പോലെ വെട്ടി തിളങ്ങുമ്പോൾ  ഇത് ഓണ നിലാവാണെന്ന് വിളിച്ചോതാൻ പണ്ടത്തെ പോലെ ഊഞ്ഞാൽ ചുവട്ടിലെ ബഹളങ്ങളില്ല. കൈ കൊട്ടിക്കളിയില്ല. ഒന്നുമില്ല. ഇന്നലെ തിരുവോണമായിരുന്നു. റോഡ് ശുഷ്കമായി കിടന്നു.  ഉത്രാടത്തിന് മദ്യശാലയിലും വസ്ത്ര വിൽപ്പന കടയിലും മാത്രം തിരക്ക്   മറ്റ് കടകളിലൊന്നും തിരക്കില്ല. ആരുടെ കയ്യിലും പൈസാ ഇല്ലാഞ്ഞിട്ടല്ല. പൈസാ അധികമായതിനാലാണ്. പട്ടിണിയിൽ നിന്നും  ഒരു ദിവസം  എങ്കിലും മോചനം നേടുവാൻ കാണം വിറ്റും ഓണം കൊണ്ടിരുന്ന നാളുകൾ അസ്തമിച്ചിരിക്കുന്നു.  ആവശ്യത്തിന് പൈസാ ഉള്ളത് കൊണ്ട് എന്നും ഓണം കൊണ്ടിരുന്നതിനാൽ  ഇന്നത്തെ ഓണത്തിനെന്ത് പ്രത്യേകത?

 നിലാവ് മാത്രം  തന്റെ ജോലി  മുറ തെറ്റാതെ നിർവഹിക്കുന്നു .